PKA 03 INILIGTAS!

 

INILIGTAS!

“Ilayo nʼyo ako sa bitag ng aking mga kaaway, dahil kayo ang aking matibay na tanggulan.

-Mga Awit 31:4-

  

                Ang Diyos ang nagligtas kay haring David sa oras ng kanyang pagkabalisa at mga problema. Madalas na hinahanapan ng tao ng solusyon ang kanyang problema. At ang mga problemang ito ay maaaring nakapaloob sa mga aspeto ng buhay: pisikal, pinansyal, mental, emosyonal, sosyal, esprituwal, at sekswal. Ang mga problemang ito ay nagsisilbing mga kaaway na maaring sumira sa tao. Sa katunayan, kahit ano pang pagsisikap ng tao na pagtagumpayan ang mga problema niya, kung nanahan lamang sa kanyang sariling kaisipan at lakas, siya’y mabibigo.

                Si haring David ay humingi ng tulong sa Diyos. Siya ay nagtiwala na kayang-kaya ng Diyos na iligtas siya sa bitag ng kanyang mga kaaway. At dagdag pa dito, iniligtas ng Diyos si haring David noong naging kaaway niya ang kanyang sarili dahil nagpadaig siya sa tukso at sinuway ang utos ng Diyos.  Alam ng Diyos ang mga pagsubok na hinakaharap ng bawat tao sa mundo. Kaya naman, huwag mahiyang lumapit sa Kaniya, aminin ang iyong kahinaan, at mapagkumbabang hingin ang Kanyang pagliligtas laban sa bitag na mayroon sa mundo. At sa huli, iyong pakatandaan na ang Diyos ang matibay na tanggulan at ililigtas ka Niya.